Алматыда туберкулезді диагностикалау, алдын алу және емдеудің заманауи бағдарламалары табысты жүзеге асырылып келеді. Бұл ауруға шалдығу мен өлім-жітім деңгейінің айтарлықтай төмендеуіне ықпал етті. Бұл туралы өңірлік коммуникациялар қызметінде өткен баспасөз конференциясында ҚР Ұлттық фтизиопульмонология ғылыми орталығының директоры, ҚР бас фтизиатры Мәлік Әденов мәлімдеді, деп хабарлайды aqshamnews.kz
Соңғы алты жылда Қазақстанда туберкулезге шалдығу 27%-ға, аурудың таралу деңгейі 32,1%-ға азайды. Алматыда да оң динамика байқалады.
«Тек өткен жылдың өзінде туберкулезге шалдығу көрсеткіші 4%-ға төмендеді. Бұл қабылданған шаралардың тиімділігін көрсетеді», – деп атап өтті Мәлік Әденов.
Қазіргі уақытта елде молекулалық-генетикалық диагностика әдістері енгізілген. Олар ауруды небәрі екі сағат ішінде анықтауға мүмкіндік береді. 2024 жылы Қазақстанда 90 мыңға жуық адам тексерістен өтті, олардың 9,1%-ында ауру расталды.
«Біз халықаралық стандарттарға сай экспресс-диагностиканы белсенді түрде қолданудамыз. Бұл ауруды ерте кезеңде анықтап, емдеуді тезірек бастауға көмектеседі», – деді сарапшы.
Алматыда бір жасқа дейінгі балалардың 97,4%-ы БЦЖ екпесін алған, бұл Дүниежүзілік денсаулық сақтау ұйымының (ДДСҰ) стандарттарына сәйкес келеді. Сонымен қатар, 12 мыңнан астам адам, оның ішінде 7 мыңнан астам бала алдын алу емін қабылдады. Бұл өткен жылмен салыстырғанда 22,4%-ға жоғары.
«Туберкулездің алдын алу жұмыстарын одан әрі жалғастырамыз, өйткені ауруды ерте анықтау оны жеңіл емдеуге мүмкіндік береді», – деді Мәлік Әденов.
Пациенттердің 95%-дан астамы инъекциясыз ем қабылдауда, ал дәріге төзімді туберкулездің емдеу мерзімі 9-12 айға дейін қысқартылған. Сондай-ақ, Алматыда 2555 бақылаулы емдеу кабинеті жұмыс істейді, онда мыңдаған науқас ем алуда.
Мемлекет пациенттерге әлеуметтік қолдау көрсетуді жалғастыруда. 2024 жылы бұл мақсатқа 2,4 млрд теңгеден астам қаржы бөлініп, амбулаториялық ем қабылдаушылардың 95%-дан астамы көмек алды.
Инновациялық диагностика, емдеу және алдын алу шараларын енгізудің нәтижесінде Қазақстан мен Алматыда туберкулезге шалдығу көрсеткіші тұрақты түрде төмендеуде. Бұл дертпен күреске арналған ұлттық стратегия халықаралық стандарттарға толықтай сәйкес келеді және жоғары тиімділігін көрсетіп отыр