Алматы қаласы бойынша Қылмыстық-атқару жүйесі департаментіне қарасты ЛА-155/18 мекемесінің ұжымы мекеме аумағын көріктендіру мақсатында көпке үлгі болар жұмыс атқарды.
Бұдан бұрын мекеменің ішкі алқабы мекеме қызметкерлерінің күшімен көріктендірілген болатын. Жақында тергеу изоляторының басшылығы мекеме аумағын одан әрі көріктендіру үшін ағаш көшеттерін отырғызды, деп хабарлайды Almaty-akshamy.kz Polisia.kz-ке сілтеме жасап.
Атап айтсақ, 23 түп боз арша, үш түп Тянь-Шань шыршасын, сегіз қайың, екі көкшіл шырша, бес түксіз терек пен 110 түп көпжылдық гүл көшеттері отырғызылды.
Алып қаланың шетіндегі тергеу изоляторының ғимараты - әлемдік стандартпен салынған ғимарат. 1400 адамға дейін ұсталатын мекемеге келушілердің көп болатыны заңды. Қамаудағы туыстарына сәлемдеме әкелетіндерді айтпағанда, күнделікті жұмыс процесімен қорғаушылар және сот, прокуратура, қоғамдық бақылау ұйымдары өкілдерінің легі еш толастамайды.
Мекеме ұжымының күшімен отырғызылған жасыл желек болашақта мекеме аумағының көркіне айналып қана қоймай, келушілерге көлеңкесімен сая болары сөзсіз.