Алматыда сәуір айынан бері абаттандыру талаптарын бұзудың 330-ға жуық дерегі анықталды, – деп хабарлайды aqshamnews.kz тілшісі.
Қалада мұндай заңбұзушылықтардың алдын алу мақсатында демалыс күндері тұрақты рейдтер өткізіліп, жұмыс күндері жаяу патрульдердің жұмысы күшейтілген.
Рейдтік іс-шаралар жұма, сенбі және жексенбі күндері ұйымдастырылады. Ал жұмыс күндері қоғамдық тәртіпті бақылау және әкімшілік құқықбұзушылықтарды анықтау үшін жаяу патрульдер күшейтіледі.
Алматы қаласы Полиция департаменті Қоғамдық қауіпсіздік басқармасы бастығының орынбасары Айтан Елеусізовтің айтуынша, қоғамдық орындарды ластау немесе қала аумағын абаттандыру қағидаларын бұзу деректері бойынша азаматтар Әкімшілік құқықбұзушылық туралы кодекстің 434-2 және 505-баптарына сәйкес жауапкершілікке тартылады. Айыппұл мөлшері 86 мың теңгеден асады.
Рейдтерге Экология департаментінің мамандары да қатысады. Олар демалушыларға табиғат аясында қоқыс қалдырмау, өрт қауіпсіздігі талаптарын сақтау және қоршаған ортаны таза ұстау жөнінде түсіндіру жұмыстарын жүргізеді.
Алматы қаласы Экология департаменті басшысының орынбасары Алмат Алқожаның мәліметінше, биыл министрліктің тапсырмасымен жедел штаб құрылып, оның жұмысы барысында 10 заңсыз қоқыс үйіндісі анықталған. Оның төртеуі бойынша тексеру жүргізілсе, қалған нысандарға қатысты аудан әкімдіктері мен жауапты тұлғаларға тиісті хаттар жолданған.