Апаттың салдары күн соңына дейін реттелмек
Алматыда су құбыры жарылып, бірнеше көшені су басты. Коммуналдық қызмет тұрғындарды мұз болған бұл жерден айналып өтуге шақырды, деп хабарлайды Almaty-akshamy.kz.
"Мыңбаев көшесі, 49 мекенжайында су құбырының жарылуына байланысты сағат 3:40-тан бастап солтүстік бағытта орналасқан көшелерді, әсіресе, Әуезов көшесін су басқан. Су Райымбек даңғылына дейін жеткен, ол жерден мүмкіндігінше арық желісіне бұрылып жатыр", - делінген хабарламада.
Көктайғақтың алдын алу үшін Алматы тазалық МҚК қызметкерлері жол бойына 18 құмсепкіш көліктің күшімен, тротуарларға 4 тротуар тазалаушы көлікпен көктайғаққа қарсы материал себуге кірісті.
Коммуналдық инфрақұрылымды дамыту басқармасының мәліметінше, апаттың салдары бүгінгі күннің аяғына дейін реттелетін болады.
Су басқан орындарда көктайғақ жабынының пайда болу ықтималдылығын ескере отырып, жүргізушілерді жылдамдықты азайтып, көлік арасындағы арақашықтықты ұлғайтып, апатты жағдайды туындатпас үшін оқыс әрекеттер жасамауға шақырамыз.
Аталған аумақтарды мүмкіндігінше айналып өтуге кеңес береміз.
Жаяу жүргіншілерді тротуарлармен жүргенде сақ болуға шақырамыз.