Алматыда Спорт күніне орай Арбатта халықаралық Red Bull Dance Your Style жобасының қалалық іріктеу кезеңі өтті, – деп хабарлайды aqshamnews.kz тілшісі.
Алматы қаласы Спорт басқармасы өкілдерінің мәліметінше, іс-шара көше биі мәдениетінің өкілдері мен жеңімпаздарды тікелей анықтаған көрермендердің басын қосты.
Қатысушылар бір-біріне қарсы форматта өнер көрсетіп, өзінің техникасын, музыкалық шеберлігін және импровизация қабілетін танытты. Би алаңында хип-хоп, хаус, поппинг, локинг, вакинг, крамп және басқа да көше биінің бағыттары ұсынылды.
Red Bull Dance Your Style жарысының ерекшелігі, мұнда дәстүрлі төрешілер алқасы болмайды әрі музыка алдын ала дайындалмайды. Бишілер әуенді баттл кезінде естиді, ал әр раундтың жеңімпазын көрермендер таңдайды.
Алматыдағы іріктеу кезеңінің қорытындысы бойынша екі жеңімпаз 30 тамызда Қарағандыда өтетін Red Bull Dance Your Style ұлттық финалына жолдама алды. Финалда Қазақстанның түкпір-түкпірінен келген үздік 16 биші бақ сынайды.
Ұлттық финалдың жеңімпазы Қазақстан атынан Red Bull Dance Your Style әлемдік финалында өнер көрсетеді. Биыл күзде әлемдік дода Цюрих қаласында өтеді.