Науқас ауруханаға бірнеше жылдан бері мазалап келе жатқан аяқтарындағы қатты созылмалы ауырсынуға байланысты түскен. Бұл ауырсыну оның күнделікті өмір сапасын едәуір төмендеткен, - деп хабарлайды Aqshamnews.kz.
Үш жыл бұрын ер адам кеуде омыртқасының VI–VII тұсында ауыр омыртқа-жұлын жарақатын алған. Осыған байланысты оған бірнеше рет ота жасалып, омыртқаны бекіту үшін транспедикулярлық фиксация жүйесі орнатылған. Алайда уақыт өте келе науқаста дәрі-дәрмекке көнбейтін, тұрақты нейропатиялық ауырсыну дамыған.
Ауру асқынып, науқастың аяқтары, кеуде тұсы және жамбас аймағында ауырсыну пайда болған. Сонымен қатар ұйқысы, қозғалысы және эмоционалдық жағдайы бұзылып, пациентке антидепрессанттар тағайындау қажеттілігі туындаған.
Созылмалы ауырсынуды азайту мақсатында мамандар жұлын нейростимуляторын имплантациялау операциясын жүргізді.
Орталық қалалық клиникалық аурухананың нейрохирургия бөлімшесінің меңгерушісі Марат Алматовтың айтуынша, электродтар жоғары деңгейде — жұлынның VI–VII мойын және I–II кеуде сегменттері проекциясына орнатылған. Құрылғы ауырсыну сигналдарының өтуін бөгейтін бақыланатын электр импульстарын беріп, ауырсыну сезімін едәуір азайтуға немесе толық жоюға мүмкіндік береді.
Жұлын нейростимуляциясы әдісі әлемдік медициналық тәжірибеде созылмалы посттравматикалық ауырсынулар, операциядан кейінгі асқынулар, сондай-ақ омыртқа мен аяқ-қолдардың ауырсыну синдромдары кезінде кеңінен қолданылады.
Бұған дейін мұндай операциялар негізінен республикалық мамандандырылған орталықтарда ғана жүргізілетін.
Қазіргі таңда жоғары технологиялық медициналық көмек Алматы қаласының Орталық қалалық клиникалық ауруханасы сияқты қалалық стационарларда да қолжетімді бола бастады.
Жұлын нейростимуляторын имплантациялау жоғары технологиялық медициналық көмек түріне жатады және Міндетті әлеуметтік медициналық сақтандыру жүйесі аясында жүргізіледі.