4 қазанда Алматы онкологиялық орталығында сүт безі қатерлі ісігіне қарсы күрес айлығы "Қызғылт қазан" аясында ашық есік күні өтті.
Акцияның мақсаты — әйелдердің онкологиялық ауруларды ерте анықтаудың маңыздылығын арттыру және профилактикалық тексеруден тұрақты өту мәдениетін қалыптастыру.
Ашық есік күні аясында 81 әйел мамандардың қабылдауында болды. Тексеру нәтижесінде 6 әйелден қосымша зерттеуді қажет ететін күмәнді өзгерістер анықталды. Ал өзіне қойылған диагнозды нақтылап, өзге маманнан кеңес алуға келген бір науқаста сүт безі қатерлі ісігі диагнозы бұрыннан расталған екен. Қазіргі таңда ол Алматы онкологиялық диспансерінде ем қабылдап жатыр. Емдеу барысы оң нәтиже көрсетіп, дәрігерлер санитарлық мастэктомияны ұсынып отыр.
Сонымен қатар, 62 әйелге сүт безінің ультрадыбыстық зерттеуі (УДЗ) жүргізілді.
Айта кетейік, акция Алматы тұрғындарының ғана емес, сонымен бірге Қонаев қаласы мен Алматы облысының, сондай-ақ Астана мен Ақмола облысының әйелдерінің де қызығушылығын туғызды.
"Қызғылт қазан" айлығы аясында осындай ашық есік күндері 11 және 18 қазан күндері де жалғасын табады. Кез келген әйел осы күндері тегін тексеруден өтіп, қатерлі ісіктің алдын алу мен ерте анықтау жолдары жөнінде мамандардан кеңес ала алады.
Мұндай шаралар дертті ерте анықтауға мүмкіндік беріп қана қоймай, әйелдердің өз денсаулығына деген жауапкершілігін арттыруға септігін тигізеді.