Әл-Фарабидің 1155 жылдығы мен Отырар музейінің 45 жылдығына арналған көрме Алматыда ашылды
Алматы музейінде әлемге танымал ғұлама ғалым әл-Фарабидің туғанына 1155 жыл және «Отырар» мемлекеттік археологиялық музей-қорығының 45 жылдығы аясында «Ұлы Жібек жолы бойындағы Отырар: ғылым мен мәдениеттің сабақтастығы» атты тақырыптық көрме ашылды.
Көрмеге Отырар мемлекеттік археологиялық қорық-музейінің қорынан алынған 200-ден астам құнды жәдігер қойылған. Экспозицияда Отырар алқабындағы қалалық мәдениет, егіншілік, сауда және өндіріс салаларына қатысты артефактілер таныстырылуда.
Бұл көрме Алматы тұрғындары мен қонақтарына ортағасырлық Отырар қаласының мәдени мұрасымен танысуға, сонымен қатар Ұлы Жібек жолының бойындағы өркениеттің даму тарихына тереңірек үңілуге мүмкіндік береді.
Көрмеде:
-
Отырартөбе, Құйрықтөбе, Алтынтөбе, Пышақшытөбе, Көк-Мардан, Күйік-Мардан, Жалпақтөбе, Қоңыртөбе, Оқсыз секілді ежелгі қалажұрттар;
-
Сауда мен қолөнер орталықтары;
-
Арыстанбаб, Найман әулие және басқа да киелі қорымдар мен архитектуралық ескерткіштер туралы ақпараттар мен жәдігерлер ұсынылған.
Көрме 1 ай бойы жалғасады.
Ортағасырлық Отырар мәдениеті, Отырар археологиясы, әл-Фараби, Ұлы Жібек жолы, Алматы музей көрмесі сынды тақырыптар қызықтыратындар үшін бұл – таптырмас мүмкіндік.