Алматыда Құлжа тас жолында асфальттың жоғарғы қабаты төселеді, осыған байланысты екі тәулікке көлік қозғалысы шектеледі, деп хабарлайды aqshamnews.kz
Құлжа тас жолында Рысқұлов даңғылынан Бұқтырма көшесіне дейінгі аумақтағы жолды қайта жаңарту жұмыстары аяқталуға жақын. Қалалық мобилділік басқармасы 14 қыркүйекте барлық жолақ бойынша көлік қозғалысын толығымен ашуды жоспарлап отыр.
Алайда асфальтбетон төсемінің жоғарғы қабатын төсеуге байланысты көлік қозғалысына уақытша шектеу енгізіледі.
-
11 қыркүйек сағат 23:00-ден 12 қыркүйек сағат 06:00-ге дейін жөндеу жұмыстары жүргізілетін аумақтың батыс жағында қозғалыс жабылады. Облыстан қалаға келгенде бұл жерді Талғар тас жолы, Бұқтырма, Майлин және Приканальная ҮАК көшелері арқылы айналып өтуге болады.
-
12 қыркүйек сағат 06:00-ден 21:00-ге дейін шығыс жақпен жол жүруге болады, сол жерде реверсивті қозғалыс ұйымдастырылады.
-
12 қыркүйек сағат 23:00-ден 13 қыркүйек сағат 06:00-ге дейін жөнделіп жатқан бөліктің шығыс жағында қозғалыс жабылады. Қаладан облысқа шыққанда Талғар тас жолы, Рысқұлов даңғылы және Приканальная ҮАК көшелері арқылы айналып өтуге болады.
-
13 қыркүйек сағат 06:00-ден 14 қыркүйек сағат 06:00-ге дейін батыс жақпен жүруге болады, ол жерде реверсивті қозғалыс ұйымдастырылады.
14 қыркүйек сағат 06:00-ден бастап жол толықтай ашылады, әр бағытта 3 жолақ болады.
Жөнделген учаскеде екі жақты қозғалыс туралы ескерту белгілері орнатылады. Жолақтар жарық шағылыстырғыш конустармен бөлінеді.
Естеріңізге сала кетейік, жоба аясында ұзындығы 2,3 км учаскеде жолақтар санын 4-тен 6-ға дейін кеңейту жоспарланған. Бұл учаскенің өткізу қабілетін екі есеге арттыруға мүмкіндік береді. Сонымен қатар, жол жиектеріне тосқауыл қоршаулары, жарықтандыру тіректері орнатылады, ал екі жағынан ені 2-ден 3 метрге дейінгі тротуарлар салу жұмыстары жалғасады.
Естеріңізге сала кетейік, қозғалысты шектеуге қатысты барлық ақпарат Almaty.kz сайтында, @AlmatyJoly Telegram арнасында, аудандық әкімдіктер мен басқармалардың әлеуметтік желілерінде, сондай-ақ 2GIS және «Яндекс карталар» сервистерінде жарияланған.