Алматыда Қазақстан халқы Ассамблеясының 30 жылдығына арналған "Менің отбасым – тірегім" байқауы өтті. Іс-шараны қалалық Ішкі саясат басқармасына қарасты "Қоғамдық келісім" КММ ұйымдастырды.
Байқаудың мақсаты — жас отбасылардың шығармашылығын ашу, ұлттық дәстүрді дәріптеу және отбасы құндылығын нығайту. Сайысқа түрлі этностан құралған бес отбасы қатысып, "Бейнетаныстыру", "Ұлттық дәстүр", "Өнерлі отбасы" және ҚХА тарихына арналған "Зияткерлік викторина" атты төрт кезең бойынша бақ сынады.
15 жыл отасып, Алишу есімді қыз тәрбиелеп отырған Рустам мен Әмина Кайрыевтер көне ұйғыр салты — "бошук той" (нәрестені бесікке бөлеу) рәсімін өткізді. Қонақтарды олар ұйғыр тағамы – санзамен қарсы алды.
"Біз әрдайым бір-бірімізді түсінуге тырысамыз", — деді Рустам Кайрыев.
Байқау қорытындысы бойынша Кайрыевтер отбасы I орынға ие болды. Екінші орын Орынғаровтар жанұясына, ал үшінші орын Данлади әулетіне бұйырды.