Кеңістікте бірнеше тақырыптық аймақ құру көзделген, деп хабарлайды aqshamnews.kz тілшісі.
Алматыда Қазақстан кинематографиясының тарихына арналған жаңа қоғамдық кеңістіктің тұжырымдамасы әзірленіп жатыр. «Қазақфильм» кинематографиялық паркін серуендеуге, демалуға және отандық кино өнерімен танысуға арналған заманауи орын ретінде құру жоспарланып отыр. Бұл туралы қаланың Қоғамдық кеңістіктерді дамыту басқармасының өкілдері хабарлады.
Тұжырымдаманың негізіне Қазақстан киносының тарихын қалалық ортамен үйлестіру идеясы алынған. Кеңістікте бірнеше тақырыптық аймақ құру көзделген. Олардың әрқайсысы келушілерді отандық кинематографияның әр кезеңдегі даму тарихымен таныстырады.
Жоба аясында серуендеуге арналған аллеялар, интерактивті және мультимедиялық инсталляциялар, ашық аспан астында фильмдер көрсетуге арналған амфитеатр, балалар алаңы мен демалыс аймақтарын салу қарастырылған.
Қазақстан киносының тарихын визуалды элементтер арқылы ғана емес, заманауи интерактивті форматтар арқылы да таныстыру көзделіп отыр. Бұл келушілерге кинематографияның даму жолымен, айтулы туындылармен және еліміздің мәдени мұрасымен қолжетімді әрі заманауи форматта танысуға мүмкіндік береді.
Кинематографиялық парк мәдениет пен қала өмірін тоғыстыратын кеңістік ретінде қарастырылған. Мұнда отандық фильмдердің көрсетілімдерін, тақырыптық кездесулер мен түрлі мәдени іс-шараларды ұйымдастыру жоспарланған.