Қазақстанда жасанды интеллект туралы қазақ тілінде жазылған алғашқы кітаптың тұсаукесері өтпек. «Жасанды интеллект әліппесі» атты еңбектің таныстырылымы 11 наурыз күні Алматы қаласындағы Smart Point орталығында (Smart Space залы, Байзақов көшесі, 280) сағат 14:00-де өтеді. Бұл туралы Aqshamnews.kz сайты хабарлайды.
Кітаптың таныстырылымында жасанды интеллект (ЖИ) технологияларының маңызы, болашағы және Қазақстандағы даму перспективалары жан-жақты талқыланады. Сонымен қатар, IT, киберқауіпсіздік, биотехнологиялар сияқты заманауи салалар бойынша пікір алмасу өтеді.
Кітап авторы Мейіржан Әуелханұлы бұл еңбек қазақ оқырмандарына ЖИ әлемін тереңірек түсінуге көмектесетінін атап өтті:
"Бұл кітап – жасанды интеллектке қызығатын кез келген адам үшін пайдалы құрал. Мұнда теориялық мәліметтермен қатар, нақты тәжірибелік қолдану мүмкіндіктері де қамтылған", – деді ол.
Белгілі журналист Қайнар Олжай кітаптың мазмұны мен құрылымына жоғары баға беріп:
"Қазақ тілінде жасанды интеллект туралы сапалы ақпарат алу қиын. Бұл кітап – осы олқылықтың орнын толтыратын құнды еңбек. Мұнда ЖИ өнімдерін ұсынатын компаниялар, негізгі терминдер мен практикалық тапсырмалар қамтылған", – деп атап өтті.
2024 жылы әлемдік ЖИ нарығының құны 190 миллиард доллардан асты. Қазақстан да бұл саланың дамуына үлес қосып, ЖИ-ді өндіріс, медицина, қаржы, білім беру салаларында белсенді түрде енгізуде.
Осы бағытта білімді дамытуды мақсат еткен AI-Hub Publishing баспасы құрылып, қазақ тілінде ЖИ, IT, киберқауіпсіздік, биотехнологиялар тақырыптарында ғылыми-көпшілік еңбектерді шығаруды жоспарлап отыр.
«Жасанды интеллект әліппесі» кітабы – қазақ оқырмандары үшін жаңа технологияларды меңгеруге арналған алғашқы толыққанды еңбек. Тұсаукесер жасанды интеллектке қызығатын барлық мамандар мен студенттер үшін маңызды шара болмақ.
Байланыс: +7 700 973 20 01