Алматы қаласының қылмыстық істер жөніндегі мамандандырылған ауданаралық сотында "қара риэлторлар" қылмыстық тобының мүшелеріне қатысты үкім шықты, деп хабарлайды aqshamnews.kz.
Қылмыстық топтың құрамында 22 айыпталушы бар. Олардың қатарында екі дәрігер, үш нотариус, бұрынғы полиция қызметкерлері, сот орындаушының көмекшісі, медициналық сарапшылар, екі риэлтор және бірнеше такси жүргізушісі бар. Бұл ұйымдасқан қылмыстық топ жалғызбасты қарт адамдардың қайтыс болғаннан кейін мұрагерлері жоқ пәтерлерді тауып, құжаттарды қолдан жасау арқылы басып алып, оларды төмендетілген бағамен сатқан.
Барлығы 37 пәтерді заңсыз иемденген. Қылмыстық топтың әрекеті 2017-2023 жылдар аралығында Алматы қаласында болған. Осы уақыт ішінде 27 азамат зардап шеккен.
Сот үкімі бойынша:
- Әшірәлі Болтабоев (Өзбекстан азаматы) 17 жылға бас бостандығынан айырылды.
- Әуелхан Сатаев 16 жылға бас бостандығынан айырылды.
- Ирина Гапарова (зейнеткер) 18 жылға бас бостандығынан айырылды.
- Медицина қызметкерлері: Психикалық денсаулық орталығының екі бұрынғы бөлім меңгерушісі және Алматы облыстық психиатриялық диспансерінің бұрынғы психиатр дәрігері сәйкесінше үш жыл, алты жыл және 10,5 жылға сотталды. Сот сарапшысы төрт жылға бас бостандығынан айырылды.
- Нотариустар: Үш нотариус қылмыстық жауапкершілікке тартылып, екі әйел алты жылға, ал олардың ер әріптесі жеті жылға бас бостандығынан айырылды.