Жарысқа 19 колледждің командалары қатысып, 7 түрлі спорт түрінен сайысқа түсті
9 қаңтар күні басталған Алматы қаласы мемлекеттік колледждерінің оқытушылары мен қызметкерлері арасында өткен қалалық 28-спартакиада өз мәресіне жетті. Жарысқа 19 колледждің командалары қатысып, 7 түрлі спорт түрінен сайысқа түскен болатын. Атап айтқанда, баскетбол, шахмат (шашкі), тоғызкұмалақ, үстел теннисі, волейбол, футбол және ұлттық ойындар (асық ату, дартс, бұқа тартыс, арқан тартыс).
Білім басқармасына қарасты Қалалық денешынықтыру және оқу-тәжірибелік орталығының спорт әдіскері Нұрғали Орынғалиевтің айтуынша, спартакиада ұлттық спорт түрлерін танымал ету, салауатты өмір салтын насихаттау, Алматы қаласы колледждері оқытушыларының арасында достық қарым-қатынасты нығайту мақсатында ұйымдастырылды.
– Спартакиада жоғары деңгейде өтті, өте тартысты жарыс болды. Өзін жақсы көрсете білген ұжымдар жеңіске жетті. Енді республикалық дәрежеде колледж студенттері арасында жарыс өткізуді жоспарлап отыр. Ал осы қалалық спартакиадада үздік болған адамдар іріктеліп, республикалық жарысқа жіберіледі. Жалпы, бұл спорттық іс-шараларымыз колледж мұғалімдері мен қызметкерлеріне ұнады деп ойлаймыз. Олар осындай іс-шаралардан сергіп, жігер-күш алады. Колл едж студенттері үшін де ұстаздарының осындай жарыстарда жеңіске жетуі серпін береді, – деді Нұрғали Орынғалиев.
Спартакиада нәтижесі бойынша жалпыкомандалық бірінші орынға Алматы энергетика және электронды технологиялар колледжі ие болды. Екінші сатыдан Алматы көлік және коммуникациялар колледжі көрінді. Жалпыкомандалық үшінші орын Алматы политехникалық колледжіне бұйырса, Алматы мемлекеттік сервис және технология колледжі 4-орынға жайғасты.
– Бұл жарыс жыл сайынан негізінен ерлер арасында өтетін. Бірақ биыл спартакиадаға қыздар да қосылды. Жалпы, ер жігіттер 5 спорт түрінен, қыздар 3 спорт түрінен бақ сынады.
Сондай-ақ, ұлттық спорт түрлеріне ерекше көңіл бөлінді. Барлығы 7 спорттүрінің төртеуінен Алматы энергетика және электронды технологиялар колледжі жеңіске жетіп, осылайша жалпыкомандалық бірінші орынға ие болды, – деді Алматы энергетика және электронды технологиялар колледжі директорының тәрбие ісі жөніндегі орынбасары Асхат Жанбосынов.
