Алматы қаласының полициясы қылмыс жиі тіркелетін ойын-сауық орындарын анықтап, олардың қауіпсіздік шараларын күшейту қажеттігін мәлімдеді, деп хабарлайды Aqshamnews.kz
Ішкі істер министрі жариялаған профилактика жылы аясында Әуезов ауданында ойын-сауық мекемелеріндегі қауіпсіздік мәселесі талқыланды. Жиынға аудандық полиция басқармасы, төтенше жағдайлар департаменті, санитарлық-эпидемиологиялық қызмет мамандары, сондай-ақ бар, мейрамхана және түнгі клуб иелері қатысты.
Әуезов аудандық полиция басқармасының бастығы Данияр Меңдебаевтың айтуынша, ауданда 65 ойын-сауық мекемесі бар, оның 16-сында бұзақылық пен төбелес жиі тіркеледі. Өткен жылы осы орындарда 61 қылмыс жасалған.
"Көптеген мекемелер тәжірибесі және тиісті лицензиясы жоқ күзет ұйымдарының қызметіне жүгінеді. Күзетшілер келушілер арасындағы жанжалдарды тоқтатудың орнына, оларды ғимараттан шығарып жіберумен ғана шектеледі. Бұл қылмыстың көбеюіне ықпал етеді", – деді Меңдебаев.
Комиссия отырысының қорытындысы бойынша ойын-сауық орындарында қылмыстың алдын алу шараларын күшейту туралы шешім қабылданды. Сондай-ақ есірткі саудасының жолын кесу жұмыстары басты назарға алынбақ.
Ойын-сауық мекемелерінің иелеріне:
Лицензиясы бар кәсіби күзет қызметін қолдану;
Бейнебақылау камераларын орнату және олардың санын арттыру;
Қақтығыс жағдайларын азайту үшін қосымша қауіпсіздік шараларын қарастыру міндеттелді.
Алматы қаласының құқық қорғау органдары қауіпсіздік ережелерін бұзған ойын-сауық орындарына қатаң шаралар қолданатынын ескертті.