Дархан Сатыбалды New Vision 2025 форумы аясында Booking.com-ның негізін қалаушы Джефф Хоффманмен кездесті
Алматыда New Vision Forum 2025 ашылды, - деп хабарлайды Aqshamnews.kz.
Оның жұмысына жиырмадан астам елден келген кәсіпкерлер, инвесторлар, сарапшылар мен креативті индустрия өкілдері қатысуда. Алқалы форум Еуразияның ірі бизнес-алаңдарының бірі саналады.
Алматы әкімі Дархан Сатыбалды форумның аясында негізгі спикерлердің бірі әрі Booking.com, Priceline.com және uBid. com,-ның тең құрылтайшысы, танымал инвестор және кәсіпкер Джефф Хоффманмен кездесті.
Әңгіме барысында тараптар кәсіпкерлікті қолдау, инновациялық экожүйені дамыту және қала экономикасына инвестициялар тарту мәселелерін талқылады. Сондай-ақ, стартаптар ауқымын кеңейту және қазақстандық компаниялардың халықаралық нарықтарға шығуы туралы сөз болды.
Форумға қатысушылар алдында сөз сөйлеген Дархан Сатыбалды Алматының өңірдегі бизнес, туризм және креативті индустриялар үшін тартылыс орталығы екенін атап өтті.
«Алматы креативті индустрияның жетекші орталығы мәртебесін сақтап отыр. Форум аясында капиталдандырылуы 40 млн долларға жуық креативті индустриялардың Қазақстандағы алғашқы қалалық венчурлық қорын құру туралы келісімге қол қою жоспарланып отыр. Қор кино, дизайн, цифрлық мазмұн және ойын индустриясындағы жобаларды қаржыландыратын болады. Оның орындалуы қала экономикасының дамуына қуатты серпін беріп, Алматының елдің қаржы және іскерлік орталығы ретіндегі рөлін одан әрі толықтыра түседі», - деп атап өтті қала әкімі.
Форум 9-11 қазан аралығында өтеді. Оған жеті мыңнан астам қатысушылар мен жүзден астам экспонент -компания өкілдері қатысуда. Алқалы жиын аясында панельдік пікірталастар, көрмелер, шеберлік дәрістері мен келіссөздер ұйымдастырылып жатыр.