Алматыда дәрігерлер жасы 40-тан асқан ер адамдарды несеп-жыныс мүшелерінің ісіктерін ерте анықтау үшін жүйелі түрде тексеруден өтуге шақырады. Өңірлік коммуникациялар қызметінің баспасөз конференциясында Алматы онкологиялық орталығының онколог-урологы Айкерім Омарова көптеген онкологиялық аурулардың асимптоматикалық түрде дамып, тек кеш сатысында ғана анықталатынын айтты, деп хабарлайды aqshamnews.kz.
«Қуық асты безінің қатерлі ісігін дер кезінде анықтау үшін жыл сайын қуық асты безінің спецификалық антигеніне тест тапсыру қажет. Оның жоғарылауы ісік процесінің басталуын көрсетуі мүмкін. Ерте диагноз сәтті емдеу мүмкіндігін айтарлықтай арттырады», - деп атап өтті маман.
Несеп-жыныс мүшелерінің қатерлі ісігі қауіп факторларына 50 жастан асқан, созылмалы қабыну процестері (пиелонефрит, простатит, цистит), жаман әдеттер, семіздік, тұқым қуалайтын бейімділік, улы заттардың әсер ету жағдайында жұмыс істеу жатады.
2024 жылы Алматыда 5209 қатерлі ісік ауруы тіркелді. Оның ішінде 518 жағдай несеп-жыныс жүйесінің ісіктерімен байланысты болды. Атап айтқанда, 218 – қуық асты безінің обыры, 189 – бүйрек жасушалы ісігі, 111 – қуық ісігі.
«Алдын алу және дер кезінде медициналық тексеруден өту – денсаулықты сақтаудың кепілі. Егер сізде зәр шығару, зәріңізде қан немесе беліңіз ауырса, дәрігерге баруды кешіктірмеңіз», - деді Омарова.