Алматыда мектеп түлектері ҰБТ-да 140 және137 балл жинады, – деп хабарлайды aqshamnews.kz тілшісі.
Өңірлік коммуникациялар қызметінің алаңында Алматыдағы мектеп түлектері журналистерге Ұлттық бірыңғай тестілеуге қалай дайындалып, қанша балл алғандарын айтып берді. №161 лицейдің оқушысы Шерәлі Ыдырысжанов ең жоғары 140 балл жинаса, №172 мектеп-гимназиясының оқушысы Заңғар Әбдіқани негізгі ҰБТ-2026-да 137 балл алыпты.
Шерәлі Ыдырысжанов былтырғы тамыз айынан бастап алдағы сынаққа жан-жақты дайындала бастапты. Бейіндік пәндер ретінде биология мен химияны таңдаған, себебі болашақта хирург болуды жоспарлап отыр екен Шерәлі.
Түлектің айтуынша, ең жоғары нәтижеге жетуіне ата-анасының, мұғалімдерінің қолдауы мен бар уақытын осыған арнағаны көмектесіпті.
«Уақытымды тиімді пайдаланып, әлеуметтік желіге кірмей, күн тәртібін сақтауға тырыстым. Қиын тақырыпты мұғалімдермен бірге талқылап, материалды үнемі қайталап отырдым», — дейді Шерәлі Ыдырысжанов.
№172 мектеп-гимназиясының 11-сынып оқушысы Заңғар Әбдіқани де ҰБТ-да жоғары нәтиже көрсеткен. Заңғар осы жолы барын салып, 137 балл алған.
Заңғар нақты жоспар құрып, күн сайын алдына белгілі бір мақсат қойып, сынақ тестілерінен кейін қатесін түзеуге көп уақыт жұмсағанын айтты.
«Математика мен бейіндік пәндерге көп көңіл бөлдім. Осындай нәтижеге үздіксіз еңбек етіп, жауапты қараудың арқасында жеттім», — дейді Заңғар.
Мектеп бітірген екеуі де ата-анасына, мұғалімдері мен мектеп ұжымына қолдау көрсеткені үшін алғыс айтып, қатарластарына сәттілік тіледі.