Қала әкімі Дархан Сатыбалды жұмыс сапары барысында бірқатар денсаулық сақтау нысандарындағы құрылыс жұмыстарының барысын тексерді, деп хабарлайды aqshamnews.kz тілшісі.
Алматыда тұрғындарға көрсетілетін медициналық көмектің қолжетімділігі мен сапасын арттыру мақсатында денсаулық сақтау нысандарын жаңғырту жұмыстары жүйелі түрде жалғасып жатыр.
Түрксіб ауданындағы Алтай-1 шағынауданында ауысымына 500 келушіге арналған жаңа емхананың құрылысы жүргізілуде. Қазіргі таңда нысанның дайындық деңгейі 70%-ға жетті. Негізгі құрылыс жұмыстары аяқталған, қажетті медициналық жабдықтарға тапсырыс берілген. Емхананы биыл қараша айында аяқтау жоспарланып отыр.
Қала әкімі Алмалы ауданындағы №1 қалалық перзентхананың жаңа ғимаратының құрылыс барысымен де танысты.
1938 жылы салынған бұрынғы ғимарат қауіпсіздік талаптары мен заманауи медициналық стандарттарға сәйкес келмеуіне байланысты бұзылды. Оның орнына аумағы 10 мың шаршы метрден асатын, 155 орынға арналған жаңа перзентхана салынуда.
Жаңа нысанда ана мен балаға қолайлы жағдай жасауға, босандыру қызметін ұйымдастыруға және шұғыл медициналық көмек көрсетуге қажетті барлық мүмкіндіктер қарастырылады. Құрылысты 2027 жылдың наурыз айында аяқтау жоспарланған.
Сондай-ақ, жұмыс сапары барысында Әйтеке би көшесінде салынып жатқан ауысымына 500 адам қабылдайтын емхана тексерілді. Қазіргі уақытта құрылыс жұмыстары бекітілген кестеге сәйкес жүргізілуде. Нысанды жыл соңына дейін аяқтау жоспарланып отыр.
«Қалада медициналық инфрақұрылымды жаңарту жұмыстары жүйелі түрде жүргізілуде. Жаңа нысандардың іске қосылуы тұрғындарға медициналық көмектің қолжетімділігін арттырып, қызмет көрсету сапасын жақсартуға мүмкіндік береді», – деді Дархан Сатыбалды.
Алматыда денсаулық сақтау саласының инфрақұрылымын жаңғырту жұмыстары алдағы уақытта да жалғасады.