Алматыдағы Ықылас атындағы халық музыкалық аспаптар музейінде «Этноәлем: Бір шаңырақ астында» атты көрме өз жұмысын бастады.
Қазақстан халқы Ассамблеясының 30 жылдығына орай «Африкалық этно- мәдени орталықпен» бірлесіп ұйымдастырылған бұл көрменің басты мақсаты – Қазақстанда өмір сүріп жатқан түрлі этностардың бай мәдени мұрасын кеңінен таныстырып, этносаралық келісім мен өзара құрметті нығайту. Іс-шара қоғамдағы бейбітшілік пен татулықты дәріптей отырып, келушілерге әр этностың болмысын, тұрмыс-тіршілігін, өнері мен дәстүрлерін тереңірек тануға мүмкіндік береді.
Көрмеде африка халықтарының музыкалық аспаптары, ұлттық киімдері, тұрмыстық бұйымдары мен қолөнер туындылары ұсынылған. Африка халқының мәдениеті мен тарихына арналған бөлім көрермендер тарапынан ерекше қызығушылық тудырып отыр. Бұл бөлімде африкалық музыкалық аспаптар, сәндік-қолданбалы өнер туындылары және этникалық нышандар көпшілік назарына ұсынылған. Келушілер үшін бұл көрме – тек мәдени танысу алаңы ғана емес, сонымен бірге ұлтаралық достық пен ынтымақтастықты нығайтатын маңызды платформа.
Көрме қонақтары ашылу салтанатында Африка халқының ұлттық музыкалық аспаптарымен кеңінен танысты. Әсіресе, африкалық джембе барабаны ерекше қызығушылық тудырды. Іс-шара барысында ұлттық өнердің тоғысуын бейнелейтін музыкалық қойылым ұйымдастырылып, онда африкалық джембенің үні мен қазақтың төл аспабы – домбыраның күмбірі үйлесім тауып, көрермендердің ыстық ықыласына бөленді. Бұл ерекше музыкалық синтез – тек өнердің шекарасы болмайтынын ғана емес, мәдениеттердің үндестігін де айқын көрсетті. Домбыра мен джембе үні арқылы түрлі халықтардың бір шаңырақ астындағы татулығы мен рухани жақындығы айқын сезілді.
Қазақстан халқы Ассамблеясы – елдегі тұрақтылық пен бірліктің символына айналған бірегей құрылым. Осы орайда қолға алынған «Этноәлем: Бір шаңырақ астында» көрмесі қоғамдық келісім мен жалпыұлттық бірегейлікті дамыту жолындағы игі бастамалардың бірі болып отыр.
Көрме 2025 жылдың 12 тамызына дейін жалғасады.