Қызықты оқиғалар мен күтпеген сәттерге толы кино қоғамдағы өзекті мәселелерді қозғайды.
Алғашқы көрсетілімге елімізге белгілі өнер жұлдыздары жиналды, деп хабарлайды aqshamnews.kz.
Қызыл кілемде – жұлдыздар, сүйікті актерларын асыға күткен көрермен. «Қолыңнан келсе, алып қаш» фильмінің алғашқы көрсетіліміне асыққандар көп. Отбасылық комедия 35 жастағы ырымшыл Самал және оның тұрмыс құрудағы мақсаты жайлы.
Ал Самалдың өмірлік жарын табуға құрбылары көмектеседі. Кино туындының қызған шағы да осы сәттен басталады. Фильмде Зарина Кармен, Айшолпан Байтүгел, Қанат Тасхан, Жансая Мұратбекқызы сынды актерлар басты рөлді сомдайды.
Айшолпан Байтүгел, актриса:
Менің сахналарым өте ауыр болды. Имитация жасамадым. Барлығын өзім жасадым. Көлікті ұрған сәттер болады. Қолым, тобығым ісіп кетеді. Құлап қаламын. Сол сәтте қатты жылағаныммен, қазір қызықты сәт болып есте қалды.
Фильм 25 күнде таспаланды. Түсірілімге Алматы облысы Жамбыл ауданындағы Дегерес ауылы мен Алматы қаласы таңдалған.
Азамат Рзағалиев, креативті продюсер:
Мұнда қоғамдағы көп мәселе, оның ішінде ажырасу жайы көтерілді. Әр әйел өзінің бақытын табуға тиіс деген ойды жеткізгіміз келді.
Отандық комедия еліміздің барлық кинотеатрында көрсетіледі.