Алматы телекоммуникациялар және машина жасау колледжінде қалалық Білім басқармасының қолдауымен «Колледж түлектерінің еңбек нарығындағы сұранысы» тақырыбында дөңгелек үстел отырысы өтті.
Іс-шараның негізгі мақсаты – заманауи еңбек нарығы талаптарына сай бәсекеге қабілетті жас мамандарды даярлауға ықпал ететін негізгі факторларды анықтау және колледж түлектерінің жұмысқа орналасу барысында кездесетін өзекті мәселелерді талқылау болды.
Дөңгелек үстел аясында қатысушылар келесі төрт модуль бойынша пікір алмасып, тәжірибе бөлісті:
-
PROFY MARATHON – 2025;
-
Дипломнан жұмысқа дейін: алғашқы қадамдар;
-
Проблемалар мен шешім жолдары;
-
Болашақ жоспарлар және өсу жолдары.
Колледж директорының оқу ісі жөніндегі орынбасары А.Макеева түлектердің еңбек жолындағы жетістіктерін атап өтіп, колледжде берілген теориялық білім мен әлеуметтік серіктестердің ұсынған тәжірибелік дағдыларының маңыздылығын ерекше атап өтті:
«Күні кеше ғана колледж қабырғасынан түлеп ұшқан түлектеріміз бүгінде Алматының жетекші компанияларында табысты еңбек етіп жүр. Олардың дөңгелек үстел барысында білдірген пікірлерінен колледжде алған білім мен тәжірибенің кәсіби мансапты бастауға берік негіз болғанын байқадық. Бұл – біз үшін үлкен мақтаныш», – деді ол.