Бүгін қазақ тілінде алғаш рет жазылған «Жасанды интеллект әліппесі» кітабының тұсаукесер салтанаты өтті, – деп хабарлайды alqshamnews.kz.
Шараға зиялы қауым өкілдері, баспа ісі мен қазақ тілінің жанашырлары, журналистер және жастар қатысты. Smart Point-та ине шаншар жер болмады – орын жетпегендер түрегеп тұрып, еліміз үшін маңызды туындының таныстырылымын тамашалады.
Кітап авторы – ЖИ саласын бірнеше жылдан бері зерттеп келе жатқан білікті маман Мейіржан Әуелханұлы. Ол жиналған қауымға кітапты жазуға не түрткі болғаны, қандай қиындықтарға тап болғаны туралы баяндады. Тұсаукесерден кейін автор оқырмандардың сұрақтарына жауап берді. Сұрақтар ұлттық және ақпараттық қауіпсіздік, отандық ЖИ әлеуеті, кітап жазу үрдісі, сондай-ақ ЖИ саласындағы тәуекелдер мен мүмкіндіктер секілді түрлі тақырыптарды қамтыды.
Кітаптың редакторы – белгілі журналист, қаламгер, публицист Қайнар Олжай. Ол ЖИ саласына қатысты қазақ тіліндегі терминдерді қалыптастыру қажеттігін атап өтіп, осы бағытта жүйелі жұмыс жүргізу керектігін ұсынды.
Жалпы, ЖИ саласы елімізде енді ғана дамып келеді. Әсіресе қазақ тілді аудитория үшін бұл өте қажет кітап. Осыны ескерген авторлар кітапты тек баспа түрінде ғана емес, арнайы «AI-Hub» сайтын ашып, цифрлы форматта да ұсынуды қолға алған.