Мемлекеттік сатып алуларға қатысу үшін жалған құжаттар жасап, 70 миллиард теңгеге жуық келісімшарт жеңіп алған қылмыстық топ анықталды, – деп хабарлайды Аqshamnews.kz.
Қаржы мониторингі агенттігінің Алматы қаласы бойынша департаменті құрылыс саласындағы мемлекеттік сатып алулар кезінде жалған мәліметтерді қолданған адамдар тобына қатысты соталды тергеп-тексеру жұмыстарын жүргізіп жатыр.
Тергеу мәліметінше, 2021 жылдан 2024 жылға дейін күдіктілер жалған компаниялар арқылы тендерлерге қатысып, жалған құжаттар мен мәліметтерді пайдалану арқылы рейтингтерін қолдан көтерген.
Бұл "қызмет" үшін ұйымдастырушылар клиенттерден 500 мыңнан 1,5 миллион теңгеге дейін сыйақы алып отырған.
Заңсыз жолмен алынған жалпы табыс 664 миллион теңгеден асқан. Бұл қаражатқа 11 автокөлік пен 12 жылжымайтын мүлік (оның ішінде 5 пәтер мен 7 жер учаскесі) сатып алынған.
Тергеу болжамы бойынша, дәл осы заңсыз тәсілдер арқылы жалпы сомасы 70 миллиард теңгеге жуық келісімшарттар жасалған.
Қазір төрт күдікті ұсталып, тергеу изоляторына қамалды.
ҚР Қылмыстық-процестік кодексінің 201-бабына сәйкес, өзге ақпараттар тергеу мүддесіне байланысты жарияланбайды.