Алматы қаласының «Бақшасарай» қабылдау үйінде ҚМДБ «Халал Даму» стандарттау және сертификаттау мекемесінің ұйымдастыруымен HALAL EXPO-2025 халықаралық көрмесі басталды, деп хабарлайды aqshamnews.kz
Көрменің ресми ашылуына Қазақстан мұсылмандары діни басқармасының төрағасы, Бас мүфти Наурызбай қажы Тағанұлы арнайы қатысты.
- Халал индустриясы бүгінде тек мұсылман қауымына ғана емес, бүкіл адамзат үшін адалдық пен тазалықтың белгісіне айналды. Бұл көрме – кәсіпкерлердің, ғалымдардың, технологтар мен тұтынушылардың басын қосып, тәжірибе бөлісуге, жаңа серіктестік орнатуға және адал өнімдер нарығын кеңейтуге жол ашатын маңызды алаң,- деді Наурызбай қажы Тағанұлы.
Сондай-ақ Бас мүфти салтанатты рәсімде үздік халал кәсіпорындар мен қызметкерлерді арнайы марапаттады. «Үздік халал кәсіпорын» номинация бойынша 8 кәсіпорын, «Үздік мамандар» номинация бойынша 8 қызметкер марапатталды.
Көрмеде отандық кәсіпкерлермен бірге Қырғызстан, Өзбекстан, Ресей, Беларусь, Моңғолия, Индонезия мен Малайзия мемлекеттерінен келген 100-ге жуық кәсіпорынның өнімдері қойылған. Шара аясында халал саласына қатысты семинар-тренингтер өтіп жатыр.