Мегаполисте Халықаралық мүгедектер күніне орай «Жүректен жүрекке» атты ауқымды қалалық инклюзивті шығармашылық фестиваль өтті. Ерекше білім беру қажеттілігі бар балаларды, жастарды және мүмкіндігі шектеулі жандарды қолдауға бағытталған бұл бастама мәдени шарадан гөрі, Алматының теңдік пен инклюзия құндылықтарын ресми түрде айқындайтын қоғамдық манифестке айналды.
Фестиваль қоғамды біріктіретін ашық алаң ретінде ұйымдастырылды. Мұнда әр бала мен жас өз қабілетін еркін көрсетіп, талантын танытуға мүмкіндік алды. Шараның идеясы мен форматы Қазақстан Республикасының Конституциясына, «Баланың құқықтары туралы» және «Мүгедектерді әлеуметтік қорғау туралы» заңдарға толық сәйкес әзірленген. Ұйымдастырушылардың айтуынша, басты мақсат – Алматыны инклюзивті мәдениеттің орталығына айналдыру.
Фестивальдің философиясы қарапайым әрі терең: «Әр адам – бірегей. Әр адам – тең». Бұл – аяушылық емес, қабылдау мен қолдауға негізделген көзқарас. «Жүректен жүрекке» арқылы қала инклюзияны әлеуметтік саясаттың бір бағыты ғана емес, мәдени кодтың ажырамас бөлігі ретінде қабылдауға қадам жасады. Осылайша Алматы Орталық Азиядағы ең ірі инклюзивті мәдени бастамалардың бірін жүзеге асырды.
Іс-шараны Алматы қаласының әкімдігі мен қалалық жұмыспен қамту және әлеуметтік бағдарламалар басқармасы, сондай-ақ «Ерекше балалардың ата-аналар одағы» республикалық қоғамдық бірлестігі бірлесіп ұйымдастырды. Фестивальге демеушілер, кәсіпкерлер, блогерлер және қоғам белсенділері де қолдау көрсетті.
«Ерекше балалардың ата-аналар одағы» РҚБ басшысы, ерекше баланың анасы Рауан Сағадиева фестивальдің мәнін былай түсіндірді:
«Біздің мақсат – балаларды диагнозына немесе жасына қарай бөлмей, барлығына тең мүмкіндік беру. Біз инклюзияны білім, денсаулық, әлеуметтік қолдау, психологиялық және құқықтық көмек арқылы дамытамыз. Бұл фестиваль арқылы қоғамға бір ғана ойды жеткізгіміз келеді: біздің балалар әдемі, талантты, мүгедектік – қорқынышты нәрсе емес. Әр баланың артында жүрек, жан, ата-ана тұр. Бізді бөлектемей, қосыңыздар», – деді ол.
Алматыда алғаш рет өткен фестивальге 25 өтінім түсіп, денсаулық жағдайына байланысты 17 қатысушы өнер көрсетті. Ұйымдастырушылардың шешімімен бұл жолы барлық қатысушы жеңімпаз деп танылып, сыйақылар табысталды. Алдағы жылдан бастап фестивальді республикалық деңгейге шығару жоспарланып отыр.
Фестивальге қатысушылардың бірі, әнші әрі ақын Асылбек Қуанышқалиев шараның атмосферасына жоғары баға берді.
«Бүгінгі фестивальге қатысқан әр жан – жеңімпаз. Алматы қаласына қоныс аударғаннан бері байқағаным, бұл қалада мүмкіндігі шектеулі жандарға ерекше көңіл бөлінеді. Қолдау нақты іспен дәлелденіп отыр. Осындай алаңдар бізге өмірге деген құштарлық пен сенім сыйлайды», – деді ол.
«Жүректен жүрекке» фестивалі Алматыда инклюзияның тек ұран емес, нақты әрекет екенін көрсетті. Бұл – талантты тану, тең мүмкіндікті мойындау және жүректен жүрекке жол табатын мәдени диалогтың бастауы.