Олар дәстүрлі оқыту форматына оралған.
Алматылық ата-аналар эпидахуалдың жақсаруын бақылай отырып, қашықтан оқыту форматынан бас тартып, балаларын мектепке жіберді, деп хабарлайды Almaty-akshamy.kz.
Білім және ғылым министрлігінің мәліметі бойынша, жаңа оқу жылының басында Алматыдағы эпидемиологиялық жағдайға байланысты ата-аналарға оқыту форматын таңдау мүмкіндігі берілді. Сол кезде білім алушылардың арасында онлайн форматты таңдағандардың саны аз болды. Яғни, оқушылардың тек 5,6%-ы, яғни 300 мыңнан астам оқушының тек 17 мыңнан кем емес бөлігі онлайн форматта оқуға ниетті болды.
«Менің немерем биыл бірінші сыныпқа барды. Орын алған эпиджағдайға алаңдап, онлайн оқыту форматын таңдадық. Алайда, немерем үйде отырмай, сыныптастарымен және мұғалімдермен араласқысы келеді. Бәрібір балаларымыз көшеде ойнап, дүкенге және қонаққа барады, үйірмелерге қатысады. Сондықтан біз дәстүрлі оқыту форматын таңдадық. Біз қашықтан білім алатын баланың еріншектік танытып, назары басқа нәрселерге ауатынын, қосымша басқа да істермен айналысатынын әрі оқу материалын жеткіліксіз деңгейде меңгеретінін түсіндік. Пандемия қашан аяқталатыны белгісіз. Індеттің аяқталуын күтіп, білім сапасын жоғалтып алмағанымыз маңызды», – деп атап өтті Алматы қаласының тұрғыны Гүлбахар Валиева.
Алматы қаласы әкімдігі білім басқармасының басшысы Ләззат Жылқыбаева қалада 300-ге жуық мектеп бар екенін атап өтті.
Оқушылардың жалпы саны бойынша балалардың сырқаттану пайызы оқу жылы басталғанға дейінгі сырқаттану деңгейімен салыстырғанда бірнеше есе төмен. Мектептерде балалардың денсаулығын қорғауды қамтамасыз ету үшін кешенді санитарлық шаралар қабылданды.
«Икемді сабақ кестесі құрылып, бастауыш, орта және жоғары сынып оқушылары үшін қосымша ауысымдар мен әртүрлі уақытта үзілістер ұйымдастырылды. Оқушылардың бір кабинеттен екінші кабинетке ауысуына тыйым салынды. Сабақтар «бір сынып – бір кабинет» қағидаты бойынша жүргізіледі. Мұғалімдер мен ата-аналар арасында санитарлық талаптарды сақтау бойынша түсіндіру жұмыстары жүргізіліп жатыр», – дейді Ләззат Жылқыбаева.