Ішкі істер министрлігі ұялы байланыс операторларымен бірлесе отырып, ел аумағында интернет-алаяқтық қызметінің жолын кесу бойынша жұмыстарды жалғастыруда, деп хабарлайды aqshamnews.kz
Алаяқтар қазақстандықтарға қоңырау шалу үшін SIM-box құрылғыларын пайдаланып, түрлі мессенджерлер арқылы әрекет етеді. Қылмыскерлердің белгілі бір елде болуы міндетті емес, оларға жергілікті ұялы байланыс операторларының интернет-трафигін қолданатын SIM-box құрылғылары жеткілікті. Бұл құрылғылар жалған нөмірлермен байланыс орнатуға мүмкіндік береді.
Жаңа жыл қарсаңында Алматы қалалық полиция департаменті ІІМ киберқылмысқа қарсы іс-қимыл департаментінің үйлестіруімен жалдамалы пәтерде SIM-box құрылғысын пайдаланып, оны үздіксіз жұмыс істеткен 25 жастағы екі ер адамды ұстады.
Тінту барысында тәркіленген заттар:
- Әрқайсысы 32 слоттан тұратын төрт SIM-box құрылғысы;
- 190 SIM-карта (қазақстандық ұялы байланыс операторларының);
- Телефондар мен ноутбуктар.
Қазіргі уақытта тергеу амалдары жүргізіліп жатыр. Ұсталғандарға қатысты "қамауда ұстау" бұлтартпау шарасы қолданылды. Құқық қорғау органдары азаматтарды мұқият болуға шақырады және кез келген күдікті жағдайлар туралы хабарлауды өтінеді.