Алматыдағы Акушерия, гинекология және перинатология ғылыми орталығының мамандары күрделі медициналық жағдайдағы жүкті әйелді сәтті босандырып алды.
35 апта мерзімде түскен науқасқа идиопатиялық апластикалық анемия (Хагеман синдромы), коагулопатия, тұрақты иммуносупрессивті терапия қажеттілігі бар созылмалы трансфузиялық тәуелділік сияқты ауыр диагноздар қойылды, деп хабарлайды aqshamnews.kz.
Дәрігерлердің айтуынша, ананың жағдайы мен жүктіліктің соңғы триместрінде туындаған асқынулар өмірге қауіп төндірді. Негізгі қауіптер — босану кезінде жаппай қан кету, тромбоз, ұрық гипоксиясы және ананың иммундық тұрақсыздығы болды.
Мамандар консилиум өткізіп, ана мен баланың өмірін сақтап қалу үшін босануды мерзімінен бұрын индукциялау туралы шешім қабылдады.
Нәтижесінде, дәрігерлердің үйлесімді жұмысының арқасында босану штаттық режимде өтті. Салмағы 2885 грамм, бойы 51 см, Апгар шкаласы бойынша 6/8 балл алған сәби дүниеге келді.
Босанғаннан кейін анаға арнайы емдеу жүргізілді: трансфузиялық терапия, анемияны түзету және тромбоздың алдын алу шаралары қабылданды.
Қазіргі уақытта ана мен бала қанағаттанарлық жағдайда. Пациент гематологтың бақылауында болып, қолдау терапиясын жалғастырады.
Медициналық орталық мамандары бұл оқиғаны ерекше жағдай деп атап, көпсалалы білікті команданың үйлесімді әрекеті өмір мен денсаулық үшін шешуші рөл атқарғанын айтты.