Парламент Сенатының Төрағасы Мәулен Әшімбаев Алматыдағы Astana Motors компаниясының заводында болып отандық автомобиль өнеркәсібінің даму перспективаларын талқылады, деп хабарлайды аlmaty-akshamy.kz.
Депутаттар кәсіпорынның жаңадан салынып жатқан блогын аралап, жұмысшылармен жүздесті. Завод 2020 жылдың қазан айында іске қосылған. Қазір ол Hyundai көлігінің 11 моделін шығарады. Оның екеуі толық цикл бойынша өндіріледі. Заводтағы барлық операция оңтүстік кореялық корпорация бекіткен стандарттар мен технологиялар бойынша жасалады. Hyundai Trans Kazakhstan жылына 50 мың автомобиль шығарады. Кәсіпорында 1300 адам жұмыс істейді. Қазіргі уақытта компания автокомпонеттер жасайтын бірнеше завод салып жатыр. Сенат спикері мемлекет отандық автомобиль өндірісін дамытуға мүдделі екенін айтты. Әсіресе Қазақстан аумағында толық циклды өндірісті қалыптастыруға басымдық беру қажет.