Жоба бұқаралық спортты дамытуға және тұрғындар арасында салауатты өмір салтын насихаттауға бағытталған, – деп хабарлайды aqshamnews.kz тілшісі.
Алматыда қалалық Спорт басқармасының бастамасымен жүзеге асырылып жатқан ALMATY MOVE жобасы жалғасуда. .
Өткен жексенбіде қаланың екі алаңында өткен тегін жаттығуларға 100-ге жуық тұрғын қатысты. Таңғы сағат 09:00-де 28 гвардияшы-панфиловшылар атындағы саябақта йога сабағы ұйымдастырылса, дәл осы уақытта Тұңғыш Президент қоры саябағында стретчинг бойынша жаттығу өтті.
Алматылықтар демалыс күнін таза ауадағы белсенділікпен бастап, денсаулығын нығайтып, сергек көңіл күйге бөленді. Алматы қаласы Спорт басқармасы өкілдерінің мәліметінше, мұндай жаттығулар спортты баршаға қолжетімді етіп, тұрғындардың демалыс күндерін белсенді әрі пайдалы өткізу мәдениетін қалыптастыруға ықпал етеді.
ALMATY MOVE жобасы алдағы уақытта да Алматының түрлі ауданында жалғасады. Тегін жаттығулардың өтетін орны мен уақыты туралы ақпарат ALMATY MOVE жобасы мен Алматы қаласы Спорт басқармасының Instagram желісіндегі ресми парақшаларында жарияланып отырады.