Алматыда басбұзарлар жедел жәрдем көлігіне кедергі жасап, медицина қызметкерлеріне зақым келтіріп, әлеуметтік нысандарды қиратып жатыр. Бұл туралы Алматы қаласы Комендатурасының ақпараттық орталығы мәлім етті, деп хабарлайды Almaty-akshamy.kz ҚазАқпаратқа сілтеме жасап.
Алматы қаласы Қоғамдық денсаулық басқармасының мәліметінше, агрессивті азаматтар мегаполистің емханалары мен ауруханаларына кіріп, медициналық мекемелердің мүліктері мен жабдықтарына зиян келтіруде.
«Заңсыз әрекеттердің салдарынан жедел жәрдемнің 5 қызметкері, оның ішінде 2 жүргізуші мен 3 медицина қызметкері зардап шекті. Зардап шеккендер қалалық стационарларға жеткізілді», – делінген хабарламада.
Сонымен қатар, 2 жедел жәрдем көлігі жойылып, Қалалық кардиологиялық орталықта қабылдау бөлмесі мен клиникалық-диагностикалық бөлімшенің әйнектері сынған.
«Алмалы ауданының АМСК ғимаратында вандализм актісі тіркелді. Наурызбай ауданында №7 ҚКА қабылдау бөлмесіне пациентпен жедел жәрдем көлігінің қатынауы тоқтатылды. Сонымен қатар, деструктивті әрекеттерді жақтаушылар жедел жәрдем көлігін тоқтатып, балаларды ауруханаларға жатқызуға жол бермейді», – деп хабарлады басқармадан.
Бұл әрекеттер пациенттерге уақтылы медициналық көмек көрсетуге кедергі келтіреді және азаматтардың денсаулығы мен өміріне қауіп төндіреді.