21 шілдеде Алматы Қалалық жедел шұғыл көмек көрсету ауруханасында Қазақстанға алғаш рет жеткізілген NEUROLITH (Storz Medical, Швейцария) аппараты таныстырылады, – деп хабарлайды aqshamnews.kz тілшісі.
Іс-шара барысында өндіруші компанияның халықаралық сарапшысы Себастьян Мюллер (Sebastian Mueller) дәріс оқып, құрылғының жұмыс істеу қағидатымен және Transcranial Pulse Stimulation (TPS) технологиясының ерекшеліктері туралы баяндайды. Сонымен қатар бұл әдістің шетелдік клиникалардағы қолданылу тәжірибесі мен оны Қазақстанның клиникалық практикасына енгізу мүмкіндіктері таныстырылады.
TPS – ми тіндеріне қысқа акустикалық импульстар арқылы әсер ететін инвазивті емес емдеу әдісі. Қазіргі таңда бұл технология Альцгеймер ауруына шалдыққан науқастарды емдеу және оңалту мақсатында бірқатар шетелдік медициналық орталықтарда қолданылып келеді.
Халықаралық сарапшының сапары аясында қазақстандық дәрігерлерге жаңа технологияны пайдалану бойынша тәжірибелік оқыту ұйымдастырылады. Мамандардың айтуынша, бұл бастама еліміздегі неврологиялық көмекті дамытуға және заманауи емдеу әдістерін енгізуге мүмкіндік береді.
Таныстырылым 21 шілде күні сағат 14:00-де Алматы Қалалық жедел шұғыл көмек көрсету ауруханасында өтеді. Мекенжайы: Қазыбек би көшесі, 96, 4-қабаттағы үлкен конференц-зал.