Қазақстан фарабитанудағы жетекші орталықтың бірі ретіндегі орнын нығайтып, сонымен қатар цифрландырудың дін мен қоғамға әсерін бағалайтын жаңа ғылыми бағыттарды қоса дамытып келеді, – деп хабарлайды aqshamnews.kz тілшісі.
Өңірлік коммуникациялар қызметінде өткен брифингте спикерлер осы туралы айтты.
Философия ғылымдарының докторы, әл-Фараби атындағы ҚазҰУ профессоры Жақыпбек Алтаев отандық фарабитану мектебі жүйелі ғылыми бағыт ретінде қалыптасып, халықаралық деңгейде мойындалғанын атап өтті.
Оның айтуынша, Қазақстанда әл-Фараби мұрасын зерттеу, аудару мен насихаттау жұмысы 1960–70 жылдары басталып, қазір жаңа деңгейге жеткен.
«Қазақстан әл-Фараби мұрасын зерттейтін әлемдегі үлкен орталықтың біріне айналды. Оның ізгі қоғам, адамгершілік пен ақыл-ойдың рөлі туралы айтқан сөздері мен идеялары бүгінде әлі де өзекті болып отыр», – дейді спикер.
Елімізде ойшылдың негізгі трактаттары қазақ-орыс тілінде жарық көргенін, әрі ғалымдардың көпжылдық зерттеуін жүйелейтін 20 томдық «Фарабитану» жинағын шығару бойынша үлкен жоба жүзеге асып жатқанын да айтады.
Брифинг барысында гуманитарлық ғылымдардың замандық даму бағыттарын да таныстырды. PhD, әл-Фараби атындағы ҚазҰУ аға оқытушысы Динара Утебаева цифрлық қоғамдағы діннің трансформациясы туралы баяндады.
Айтуынша, интернет пен әлеуметтік желі ақпарат тарататын арна ғана емес, жаңа діни тәжірибе мен бірегейлікті қалыптастырар кеңістікке де айналған.
«Қазір медиакеңістіктегі дін – бұл тек коммуникация емес, жастар арасында жаңа әлеуметтік тәжірибе мен құндылық қалыптастыратын орта», – дейді.
Спикердің айтуынша, алдағы зерттеулер алгоритмдердің, жасанды интеллектінің ықпалы, медиасауаттылық пен онлайн-радикализацияның алдын алу мәселесіне бағытталмақшы.