Алматыдағы №2 Балалар қалалық клиникалық ауруханасында ресейлік мамандардың қатысуымен үш күндік шеберлік сағаты өтті.
Іс-шара барысында белгілі ортопед-травматолог Георгий Чибиров пен Орхан Гатамов №2 БҚКА дәрігерлерімен бірлесіп, ауыр нейроортопедиялық кемістіктерге шалдыққан қазақстандық 4 балаға бірегей ота жасады, деп хабарлайды aqshamnews.kz.
Жоғары технологиялық медициналық көмек МӘМС қаражаты есебінен жасалды.
«Біздің клиникада бір мезетте көп деңгейлі ота жасау тәжірибесі белсенді түрде қолданылады. Көп деңгейлі операция барысында анестезия да бір рет қолданылады, біздің мамандар бірнеше манипуляцияны кезең-кезеңмен жүзеге асыра алады. Ал мұндай оталарды ортопедия саласында жинақтаған тәжірибесі мол ресейлік әріптестермен бірлесіп жасау пациенттерге көрсетілген хирургиялық көмектің нәтижесін еселендіре түсетіні хақ. Оның үстіне, үнемі өзара тәжірибе алмасудың сырқаттарды емдеуде атқарар рөлі де зор», - деп атап өтті №2 БҚКА директоры Марат Рабандияров.
Шеберлік сабағы барысында науқастар консультация алды, дәрігерлер балалардың церебралды сал ауруына шалдыққан сырқаттарға оперативтік ем жасаудың қосымша техникаларын меңгерді. Барлығы түрлі медицина ұйымдарында еңбек ететін 16 маман біліктілігін арттырып, тәжірибе алмасуға мүмкіндік алды.
№2 БҚКА травматолог-ортопеді Ұлжан Солтанбекованың айтуынша, нейроортопедиялық кемістікке, әсіресе церебралды сал ауруына шалдыққан балаларға көп деңгейлі ота жасау қиын, дегенмен өте қажет. Себебі аяқ-қол кемістігі тізе буыны, жіліншік, жамбас, табан т.б. органдардың қызметін бұзады. SEMLS әдісі церебралды сал ауруымен ауыратын балаларға бір мезетте бірнеше ота жасап, аяқ-қол кемістігін реттеуге мүмкіндік береді. Бұл операциялар пациенттердің өмір сапасын жақсартуға, ауырсынуды төмендетуге, қимыл-қозғалыс аппаратындағы кемістіктер мен баланың жүрісін түзетіп, жақсартуға, кемістік салдарын азайтуға бағытталған әрі отадан кейінгі қалыпқа келу мерзімін де қысқартады.
Неврологиялық дерттермен ауыратын балаларды дәрігерге дер шағында қарату өте маңызды, олар неврологтардың тұрақты бақылауында болып, тағайындалған ем мен ортопедиялық құрылғыларды белсенді түрде пайдалануы тиіс, дейді мамандар.