Алматы әкімі Ерболат Досаев Түрксіб ауданының тұрғындарымен кездесуде ауданның қолжетімді әрі сапалы медицинаны дамыту жоспары туралы айтты, деп хабарлайды aqshamnews.kz
Былтыр қазан айында Нұршашқан шағын ауданында заманауи құрал-жабдықтармен жабдықталған жаңа отбасылық дәрігерлік амбулатория ашылды. Ол бір ауысымда 100 адамды қабылдауға арналған, бүгінде оның қызметін 12 мыңнан астам адам пайдаланды.
«2025 жылдың тамыз айында Айбасов көшесінде бір ауысымда 200 адамды қабылдайтын тағы бір отбасылық дәрігерлік амбулаторияның құрылысы аяқталады», — деді қала басшысы.
Жедел жәрдем күту уақытын қысқарту мақсатында Намаган көшесінде 10 бригадаға арналған №13 жедел медициналық жәрдем қосалқы станциясы ашылды.
Сонымен қатар, келесі айда №20 қалалық емхананың ғимаратында күрделі жөндеу жұмыстарын аяқтау жоспарланып отыр.
Биыл Намаган көшесінде бір ауысымда 500 адамды қабылдайтын жаңа емхана, Әлмерек және РВ-90 шағын аудандарында әрқайсысы бір ауысымда 200 қабылдауға арналған екі отбасылық дәрігерлік амбулаторияның құрылысына қатысты жобалардың мемлекеттік сараптамасы аяқталмақ. Сондай-ақ, №8 қалалық клиникалық аурухананы реконструкциялау және қосымша құрылыс жобасы қарастырылуда. Қазіргі уақытта аурухана 1961 және 1972 жылдары салынған ғимараттарды пайдаланып отыр.
№8 қалалық аурухананы қайта жаңарту аясында ересектер мен балаларға арналған көпбейінді стационарлар мен поликлиниканы біріктіретін бірыңғай медициналық кластер құру жоспарланған. Мұнда тұрғындарға жоғары технологиялық медициналық көмек көрсетіледі.