33 жастағы ер адам шие сүйегінен уланып, өліп қала жаздады, деп хабарлайды aqshamnews.kz
Алматы қаласы қоғамдық денсаулық сақтау басқармасының мәліметінше, оқиға алдында ер адам шие сүйектері бар үйде дайындалған шарап ішкен. Шақыртылған жедел жәрдем оны бірден №7 қалалық клиникалық ауруханаға жеткізіп, науқасты реанимациялық бригада қарсы алды.
"Шие сүйегі синил қышқылын бөледі", – деп түсіндірді №7 қалалық клиникалық аурухананың реаниматолог-дәрігері Клара Жармағамбетова.
Аурухана баспасөз қызметінің мәліметі бойынша, шие сүйегінде кездесетін амигдалин гликозиді асқазанға түскенде, асқазан сөлі әсерінен синил қышқылына айналып, күшті уға айналады. Ол адамды улап, тіпті өлімге әкелуі ықтимал. Үйде дайындалған тұнба немесе шарапта синил қышқылының мөлшері айтарлықтай жоғары болуы мүмкін, сондықтан дәрігерлер шие сүйегін жұтпауға кеңес береді.