Алматы қаласында өткен "Қарасора" жедел-алдын алу іс-шарасы барысында есірткіге қарсы күрес басқармасы ірі көлемдегі есірткі затын тәркіледі, деп хабарлайды Aqshamnews.kz тілшісі Polisia.kz-ке сілтеме жасап.
Полицияның мәліметінше, экологиялық бекетте 59 жастағы қала тұрғыны басқарған Toyota тоқтатылған. Кейін Наурызбай ауданындағы оның үйіне жүргізілген тінту кезінде ауладан 13 түп қарасора анықталды. Сараптамаға сәйкес, тәркіленген есірткінің жалпы салмағы 24 келі 680 грамм.
Қазіргі уақытта күдікті ұсталып, уақытша ұстау изоляторына қамалды. Аталған дерек бойынша сотқа дейінгі тергеу амалдары жүргізіліп жатыр.
"Полиция қызметкерлері есірткі таратудың жолын жүйелі түрде кесіп келеді. Жедел уәкілдер, арнайы жасақ және кинологтардың үйлесімді жұмысының нәтижесінде заңсыз айналымға түсуі мүмкін болған ірі көлемдегі қарасораның жолы кесілді. Есірткі қылмыстарын анықтау және олардың алдын алу шаралары жалғасын табады", – деді Алматы қалалық полиция департаменті есірткі қылмысына қарсы күрес басқармасының бастығы Мұрат Жұмабаев.