Алматыда жылу шаруашылығын жаңғыртудың ең үлкен кезеңі аяқталып қалды. «Алматы қаласын дамыту жол картасы» аясында «Алматытеплокоммунэнерго» ЖШС-нің 17 қазандығы жөнделді. Бұл — қаладағы барлық нысандардың шамамен 20%-ы. Энергетика және сумен жабдықтау басқармасының басшысы Нұрбақыт Серікбай Өңірлік коммуникациялар қызметінің брифингінде осылай деп хабарлады.
Жөндеу жұмыстары Түрксіб, Медеу, Алатау мен Жетісу аудандарында жүргізілді. Жобалар аясында ескірген жабдықтар ауыстырылып, басқару жүйелері жаңартылды, жаңа деаэраторлар, сорғылар мен аккумуляторлық бактар орнатылды, сондай-ақ осы заманғы қазандық ғимараттары салынды.
«Кәсіпорын қазандықтарды жөндеу, жаңарту мен қайта құру бойынша көп жұмыс істеді. Басты мақсатымыз — қала тұрғындарын сенімді, қауіпсіз және тиімді жылумен қамтамасыз ету», — дейді басқарма басшысы.
2026 жылы жол картасы аясында тағы 20 қазандықты жаңарту жоспарланып отыр. 2030 жылға дейін 61 нысан жаңғыртылмақ. Бұл қаладағы жылу жүйесінің қуатты үнемдеп, сенімді әрі таза болуын қамтамасыз етпек.