Сайлау күні 170 «Инватакси» көлігі қызмет көрсетіп жатыр, деп хабарлайды aqshamnews.kz тілшісі.
Құрылтай сайлауы күні Алматыда жүріп-тұруы қиын қала тұрғындарын сайлау учаскесіне инватакси тегін жеткізіп жатыр. Бұл қызметті мегаполистің Қоғамдық кеңесінің мүшесі Богдан Джепка да пайдаланды.
Арнайы жабдықталған көлік оны №671 сайлау учаскесіне жайлы әрі қауіпсіз алып келді.
«Инватаксидің арқасында сайлау учаскесіне еш қиындықсыз әрі қолайлы жағдайда жеттім», – деді Богдан Джепка.
Еске салайық, жүріп-тұруы қиын азаматтарға Алматы қаласының әкімдігі «Инватакси» қызметін ұсынды. Бұл қызметті кресло-арбамен қозғалатын және тірек-қимыл аппараты бұзылған мүгедектігі бар адамдар, сондай-ақ көру қабілеті бұзылған мүгедектігі бар азаматтар пайдалана алады.
Сайлау күні 170 «Инватакси» көлігі қызмет көрсетіп жатыр. Оның 36-сы арнайы жабдықталған, ал 134-і жеңіл автокөлік.