Алматыда жол қозғалысы ережелерінің сақталуын қамтамасыз ету және балалар мен жаяу жүргіншілердің қауіпсіздігін ұйымдастыру мақсатында профилактикалық іс-шаралар жүргізілуде, деп хабарлайды aqshamnews.kz
Өңірлік коммуникациялар қызметінің брифингінде Алматы қаласы Полиция департаментінің ресми өкілі Салтанат Әзірбек жыл басынан бері қалада балалардың қатысуымен 623 жол-көлік оқиғасы тіркелгенін хабарлады.
Салтанат Әзірбек ата-аналарды балаларына жолды дұрыс кесіп өтуді үйретуге және самокаттар мен мопедтерді жүргізуге жол бермеуге шақырды. Сонымен қатар, ересектердің өздері де балаларға дұрыс жүріп-тұрудың үлгісін көрсету керектігін атап өтті.
“Әрбір ата-ана кәмелетке толмаған балаларға электрлік самокаттарды, мопедтерді және скутерлерді мінуге рұқсат берер алдында баланың қауіпсіздігі, денсаулығы мен өмірі туралы ойланғаны жөн. Жасөспірім көлік жүргізу дағдыларынсыз, қауіпсіздік нормалары мен жол қозғалысы ережелерін сақтамай, өзіне де, басқаларға да қауіп төндіруі мүмкін. Мұндай абайсыздықтың бағасы сіздің балаңыздың денсаулығы немесе өмірі болуы мүмкін екенін естен шығармаңыздар,” - деді ол.
Сонымен қатар, ол заңға сәйкес 16 мен 18 жас аралығындағы кәмелетке толмағандарға жол бойында электр самокаттарды жүргізуге тыйым салынатынын еске салды. Бұл үшін ӘҚБтК-нің 620-бабы бойынша әкімшілік жауапкершілік көзделген. Заңды өкілдер ҚР ӘҚБтК-нің 127-бабы бойынша әкімшілік жауапкершілікке тартылады.
Алматы полициясы көліктің баламалы түрлерін басқаратын адамдар, оның ішінде кәмелетке толмағандар арасында түсіндіру жұмыстарын жалғастыруда. Алматыда жыл басынан бері мопедтердің қатысуымен 359 жол-көлік оқиғасы орын алып, 364 адам жарақаттанып, 6 адам қайтыс болған. Электр самокаттарының қатысуымен 47 апат орын алып, 51 адам жарақат алған.
Жыл басынан бері жол қозғалысы ережелерін бұзғаны үшін 15 мыңнан астам мопед жүргізушілері және самокат тізгіндеген 12 мыңнан астам адам әкімшілік жауапкершілікке тартылған.