Үкімет Алматы облысы, Кеген ауданының Жалағаш ауылында спорт кешенін салуға 1,1 млрд теңге бөлді. Жоба «Заңсыз иемденілген активтерді мемлекетке қайтару туралы» Заң аясында іске асырылып отыр, деп хабарлайды aqshamnews.kz
Президенттің тапсырмасына сәйкес, Арнаулы мемлекеттік қордан алынған қаражат өңірлердегі әлеуметтік маңызы бар нысандардың құрылысына бағытталуда.
Жаңа спорт кешені дене шынықтыру дайындығы бойынша оқу-жаттығу сабақтарын өткізуге және жарыстар ұйымдастыруға арналған. Кешенде бокс, күрес және басқа да спорт түрлеріне арналған бірнеше залдар қарастырылған.
2024 жылы елімізде 90 дене шынықтыру-сауықтыру кешені салынды, олардың басым бөлігі ауылдық жерлерде орналасқан. Сонымен қатар, Үкімет 2025 жылдың соңына дейін 113 жаңа спорт нысанын салу және 26 спорт мекемесін реконструкциялауды жоспарлауда.
Бүгінгі таңда Арнаулы мемлекеттік қордан әлеуметтік маңызы бар нысандарды салуға шамамен 50,6 млрд теңге бөлінді. Бұл қаражат есебінен 4 мектеп, оның ішінде музыкалық мектеп, спорт кешені, көпсалалы аурухана, жатақхана және 2 балабақша салынуда.
«Заңсыз иемденілген активтерді мемлекетке қайтару туралы» Заң негізінде Арқалық, Астана, Алматы қалаларында әлеуметтік инфрақұрылым нысандарының құрылысы жалғасуда.