Алматы қаласы мен Шаньдун провинциясы туризм саласында ынтымақтастық туралы меморандумға қол қойды, - деп хабарлайды аqshamnews.kz.
Алматыда Қазақстан мен Қытай арасындағы туризм саласындағы ынтымақтастық туралы меморандумға қол қойылды. "Қазақстан – Қытай" туризм жылы аясында жасалған бұл меморандум Қытай Халық Республикасынан туристерді тартуға бағытталған жаңа стратегиялық мүмкіндіктерге жол ашады. Бұл туралы қалалық Туризм басқармасынан хабарлады.
Алматы қаласының Туризм басқармасы мен Шаньдун провинциясының туристік ұйымдары арасында қол қойылған келісімдер бірлескен туристік өнімдерді дамытуға, Қытайдан келетін туристер ағынын арттыруға және қаланың инфрақұрылымын кеңейтуге бағытталған. Бұл қадамдар Алматының халықаралық туристік орталық ретіндегі орнын нығайтып, екі ел арасындағы мәдени және іскерлік байланыстарды дамытуға ықпал етеді.
2024 жылы Алматы қаласына Қытайдан 99 мыңнан астам турист келген, бұл өткен жылмен салыстырғанда 50%-ға көп. Меморандум Қытайдан келетін туризмді дамытудағы маңызды кезең болып табылады және қонақжайлылық пен туризм саласындағы ұзақ мерзімді, өзара тиімді ынтымақтастықтың жаңа мүмкіндіктерін ашады.