Алматы қаласының жастарына тұрғын үй сатып алуға арналған жеңілдетілген несие алу бағдарламасына өтініш қабылдау басталды, деп хабарлайды aqshamnews.kz
35 жасқа дейінгі жастар 29 шілде мен 7 тамыз аралығында almaty-zhastary2024.kz сайты арқылы өтініш бере алады. Өтініш беру үшін электрондық цифрлық қолтаңба қажет.
Бағдарлама аясында несие беру шарттары:
- Қарыздың ең көбі – 18 млн теңгеге дейін;
- Пайыздық мөлшерлеме – 5%;
- Бастапқы жарна – 10%;
- Бастапқы және қайталама тұрғын үй алу мүмкіндігі.
Биыл 1 200 адамды қамту жоспарланған. Бағдарламаға қатысу үшін қойылатын негізгі талаптар:
- Қазақстан Республикасының азаматтығы.
- Тұрақты тіркеу: Өтініш беру кезінде өтініш берушінің және жұбайының (бар болса) Алматы қаласында тұрақты тіркеуі болуы.
- Жас шектеуі: Өтініш беру кезінде қатысушы 35 жасқа толмауы керек, ал жұбайының (бар болса) жасы есепке алынбайды. Бағдарламаға негізгі қатысушы ретінде ерлі-зайыптының біреуі ғана қатыса алады.
- Тұрғын үйдің болмауы: Қатысушының және оның отбасы мүшесінде меншік құқығында тұрғын үйдің болмауы, сондай-ақ Қазақстан аумағында соңғы 5 жыл ішінде тұрғын үй жағдайын әдейі нашарлату дерегінің болмауы.
- Жұмыс өтілі: Қатысушының Алматы қаласында денсаулық сақтау, білім беру, мәдениет, спорт, ЖОО-лар және ғылыми-зерттеу институты, журналистика, әлеуметтік салада, құқық қорғау органдарында, қалалық коммуналдық қызметтерде және «Жұмыс істейтін жастар» бағдарламасы бойынша жалдамалы жұмыс (2019 жылы желтоқсан) санаттарында ең кемі соңғы 6 ай бойы міндетті зейнетақы аударымы бар жұмыс өтілі болуы қажет.
Бағдарламаға қатысу үшін өтініш берушілер almaty-zhastary2024.kz сайтына кіріп, қажетті мәліметтерді толтырып, электрондық цифрлық қолтаңба арқылы өтініштерін жібере алады.
Бұл бағдарлама жастардың тұрғын үй мәселесін шешуге бағытталған маңызды қадам болып табылады. Жас қазақстандықтардың өмір сүру сапасын жақсартуға арналған бұл мүмкіндік көптеген отбасылар үшін қолжетімді болмақ.