2024 жылдың қорытындысы бойынша Алматы Қазақстандағы IT-сектордың дамуы бойынша көшбасшы болып қала береді.
Қала елдегі барлық IT-қызметтердің 52%-ын қамтамасыз етеді, деп хабарлайды aqshamnews.kz.
Жалпы IT-нарықтың көлемі 3089 млрд теңгені құраса, оның 1592 млрд теңгесі Алматыға тиесілі. Бұл туралы Алматы қаласы цифрландыру басқармасы басшысының орынбасары Мейрам Дюсюков Өңірлік коммуникациялар қызметінде өткен баспасөз конференциясында мәлімдеді.
2022 жылы «Алматы қаласының 2025 жылға дейінгі даму бағдарламасы» бекітілген болатын. Оның негізгі бағыттарының бірі – “Smart City” (Ақылды қала) концепциясы. Осы бағдарламаның аясында стартаптар мен технологиялық жобалар белсенді түрде қолдау табуда.
«Біз бүгінге дейін үлкен нәтижелерге қол жеткіздік. 2024 жылы 7 мыңнан астам адам акселерациялық бағдарламаларға қатысты, 2 мыңнан астам жаңа жұмыс орны ашылды, ал тартылған инвестиция көлемі 13,2 миллион АҚШ долларын құрады»– деп атап өтті Дюсюков.
Алматыда технологиялық кәсіпкерлік экожүйесін дамыту жұмыстары жалғасуда. Қалада инновациялық идеяларды қолдау мен инвесторларды тартуға бағытталған “Smart City Accelerator”, “Almaty Innovation Challenge Hackathon” және “Startup Weekend” сынды жобалар іске асырылуда.
Сонымен қатар, қалада жасанды интеллект (AI) технологиялары енгізілуде. ИИ (AI) қаланың жол қозғалысын талдауға, азаматтардың өтініштерін өңдеуге және қалалық инфрақұрылымды басқаруға көмектеседі.