Алматы баскетболшылары 15 жасқа дейінгі командалар арасында Қазақстан чемпионы атанды, – деп хабарлайды aqshamnews.kz тілшісі.
Алматыда 2010 жылы туған ұлдар клубтық командалары арасында Ұлттық лига (U-15) аясындағы Қазақстан Республикасының чемпионаты аяқталды. Бұл туралы қалалық Спорт басқармасының өкілдері айтты.
Жарыс қорытындысы бойынша чемпиондық атақты Алматы атынан сынға түскен «Алматинский легион 2010» командасы жеңіп алды. Финалда алматылықтар «Астана U15» ұжымын ұтып, алтын медальға қол жеткізді.
Команда үшін маусым аса нәтижелі болды: 28 ойынның 26-сында жеңіске жетіп, тек екі кездесуде ғана қарсыластарға жол берді. Бұл нәтижеге тұрақты чемпионат пен плей-офф кезеңіндегі ойындар кіреді.
Турнир қорытындысы бойынша алматылық спортшылар бірқатар жеке марапатқа ие болды:
— чемпионаттың үздік ойыншысы — Асанәлі Алматұлы;
— чемпионаттың MVP ойыншысы — Лев Горинский;
— 2025/2026 маусымының үздік жаттықтырушысы — Анастасия Овечкина.
Чемпионат 2025 жылдың қазан айынан 2026 жылдың мамыр айына дейін өтіп, ұлттық құрама резервін даярлауда маңызды алаңға айналды.