Алматы қалалық Азаматтық альянсы Тұрақты даму мақсаттары (ТДМ) бойынша қоғамдық мониторинг орталығын іске қосты.
Орталық үкіметтік емес ұйымдар (ҮЕҰ) жобаларының тиімділігін талдаумен айналысады. Бұл жөнінде Алматы Азаматтық альянсының төрағасы Қайыржан Әбдіхалықов Өңірлік коммуникациялар қызметінде (ӨКҚ) өткен баспасөз конференциясында мәлімдеді. Ұйымның басты мақсаты – мемлекеттік құрылымдар, ҮЕҰ мен азаматтар арасындағы өзара іс-қимылды дамыту арқылы әлеуметтік және қоғамдық мәселелерді бірлесіп шешуге ықпал ету. Сонымен қатар, аталған альянс экология, инклюзивті білім беру және қоғамдық бастамаларды қолдау бағытында да белсенді жұмыс жүргізуде.
Альянс жұмысына әртүрлі ҮЕҰ мен белсенді азаматтар қатысады. Қаланың маңызды мәселелерін талқылауға тұрғындарды тарту үшін қоғамдық тыңдау, «дөңгелек үстел» үрдісіндегі жиын мен форумдар ұйымдастырылады. Бұрнағы жылы Алматыда «Тұрақты даму мақсаттарын жүзеге асыру» тақырыбында XIII Азаматтық форум өтті. Онда аймақтағы тұрақты дамуға қол жеткізудің стратегиясы мен жолдары қарастырылды.
«Келесі форум мамыр-маусым айларында өтеді деп жоспарлануда. Ол Алматыдағы азаматтық қоғамның институционалдық мәселесі мен даму перспективасына арналмақ. Форум қарсаңында өзекті тақырыпты талқылайтын бірқатар «дөңгелек үстел» үрдісіндегі жиын мен диалогтық кездесулер өткіземіз. Бұл диалог алаңдарына өзара сындарлы пікір алмасу мен шешім іздеуге жәрдемдесу мақсатында құрылған Үйлестіру кеңесі мен Алматы сарапшылар клубы белсенді қатысады», – деп атап өтті Қ.Әбдіхалықов.