Алматы қаласының Өңірлік коммуникациялар қызметі алаңында қала әкімінің орынбасары Нұрлан Әбдірахымның қатысуымен баспасөз конференциясы өтті. Іс-шарада аз қамтылған және әлеуметтік осал топтарға көрсетілетін әлеуметтік қолдау шаралары талқыланды.
Өмірлік қиын жағдайда қалған отбасыларды анықтау бойынша кешенді жұмыс жүргізілуде. «Отбасының цифрлық картасы» платформасы аясында 1 819 отбасы (яғни 9 063 адам) 755 млн теңге көлемінде атаулы әлеуметтік көмек алды.
Әкімнің орынбасарының айтуынша, қаланың әлеуметтік саясаты тек қаржылай қолдауға ғана емес, азаматтарды еңбекке ынталандыруға және өз отбасын өздігінен қамтамасыз етуге бағытталған.
«Биыл мүгедектігі бар 33 мыңнан астам адам оңалту құралдарымен және әлеуметтік қызметтермен қамтылды. Бұл мақсатқа 12,2 млрд теңге бөлінді. Сонымен қатар, 277 адамға құны 1,3 млрд теңгені құрайтын инновациялық техникалық құралдар берілді», - деді Нұрлан Әбдірахым.
2026 жылы Әлеуметтік қорғау саласын дамытудың ұлттық ғылыми орталығымен бірлесіп, жеке оңалту техникалық құралдарын іріктеу жүйесін енгізу жоспарлануда. Бұл жүйе қызмет алушылардың жеке ерекшеліктері мен медициналық көрсеткіштерін ескеруге мүмкіндік береді.
«Инватакси» қызметі де дамып келеді. Қаржыландыру көлемінің артуы нәтижесінде автопарк 145 көлікке дейін ұлғайды. «Яндекс Такси» агрегаторы арқылы іске қосылған пилоттық жоба пайдаланушылар санын 2 мыңнан 3,4 мың адамға дейін арттырды. 2026 жылдан бастап бұл қызметті II және III дәрежелі психикалық ауытқуы бар адамдар да пайдалана алады. Қызмет сапасын арттыру мақсатында өтінімдер мен бағыттарды цифрлық түрде бақылайтын автоматтандырылған диспетчерлік жүйе енгізілуде.