Алматы академиясында Қазақстанның түкпір-түкпірінен келген ішкі істер органдарының қызметкер әйелдерін біріктіретін дәстүрлі "Көшбасшы әйел" форумы өтті.
Форумға қатысушылар – құқық қорғау саласында айтарлықтай жетістікке жеткен, қоғамдық қауіпсіздікті қамтамасыз етуде маңызды рөл атқаратын білікті мамандар, деп хабарлайды aqshamnews.kz Polisia.kz-ке сілтеме жасап.
Бұл форум – кәсіби тәжірибе алмасуға, жаңа білім мен дағдыларды игеруге, іскерлік байланыстарды кеңейтуге мүмкіндік беретін бірегей алаң. Іс-шара аясында тренингтер, шеберлік сабақтары, пікірталас алаңдары ұйымдастырылып, академия бойынша таныстыру экскурсиялары өткізілді. Дегенмен, ең бастысы – форум аясында ашық сұқбат құру арқылы әйелдердің ішкі істер жүйесіндегі рөліне қатысты өзекті мәселелерді талқылау мүмкіндігі.
- Қазіргі таңда ішкі істер органдарындағы әйелдер маңызды қызметтерді атқарып, құқықтық тәртіпті қамтамасыз етуге өлшеусіз үлес қосып келеді. Олар жедел-іздестіру саласынан бастап, әкімшілік басқару, профилактикалық жұмыстар, азаматтардың құқықтарын қорғау және қоғамдық тәртіпті сақтау бағытында табысты еңбек етіп жүр. "Көшбасшы әйел" форумы – жай ғана кездесу емес, бұл – кәсіби дамуға, көшбасшылық қабілеттерді шыңдауға және ұжымдық рухты нығайтуға арналған мықты алаң, – деп атап өтті ҚР ІІМ Алматы академиясы бастығының орынбасары Жанат Дильбарханова.
Погондағы әйелдер мұндай шаралардың қоғамдағы оң өзгерістердің қозғаушы күш екеніне сенімді, сондай-ақ тек кадрлық әлеуетті нығайтуға және кәсіби өсуге жағдай жасауға ғана емес, сонымен қатар әйелдердің әртүрлі салаларда өзін-өзі дамытуына мүмкіндік береді. Бірлесе жұмыс істеу арқылы олар қоғамда әділеттілік пен теңдікті нығайтып, білім мен әлеуметтік қорғалуды арттырып, болашақ ұрпақты басқару, бизнес, ғылым, саясат және қоғамдық қызметке белсенді қатысуға жігерлендіреді. Бірін-бірі қолдап, ынтымақтастықты арттыру арқылы көшбасшы әйелдер тұтас қоғам үшін үйлесімді әрі тұрақты болашақ қалыптастыруға ықпал етеді.