2023 жылдың қорытындысы бойынша әлемдік жел энергетикасының қуаты 1 ТВт-тан асып, өткен жылмен салыстырғанда 12,9%-ға артты. Қытай бұл салада көш бастап, жел энергетикасының қуаты 441,9 ГВт-қа жеткізді. Екінші орында тұрған АҚШ-тың (148 ГВт) көрсеткішінен үш есе көп. Сонымен қатар, Германия (69,5 ГВт) және Үндістан (44,7 ГВт) да айтарлықтай нәтижелерге қол жеткізді, деп хабарлайды aqshamnews.kz.
Сондай-ақ, 2023 жылы күн энергетикасының жаһандық қуаты 32,2%-ға артып, 1,4 ТВт-қа жетті. Бұл жағынан да Қытай алда тұр. Оның күн энергетикасының қуаты 609,9 ГВт-қа жетіп, АҚШ-тың (139,2 ГВт) көрсеткішінен 4,4 есе артық. Күн энергетикасында Жапония (87,1 ГВт), Германия (81,7 ГВт) және Үндістан (73,1 ГВт) да маңызды рөл атқарды.
Жел және күн энергетикасының қуатының айтарлықтай өсуіне қарамастан, олардың энергия өндіру көлемі әлемдегі электр энергиясына деген сұраныстың артуына сәйкес келмей отыр. 2023 жылдың қорытындысы бойынша әлемде өндірілген электр энергиясының жалпы көлемі 29,9 ПВт⋅сағ (петаватт-сағат) құрап, 2,5%-ға өсті. Жел энергетикасы 10,3%-ға артып, 2,3 ПВт⋅сағ-қа жетсе, күн энергетикасы 24,2%-ға өсіп, 1,6 ПВт⋅сағ өндірді. Жел энергетикасының әлемдік электр энергиясын өндірудегі үлесі 7,8%, ал күн энергетикасының үлесі 5,5% болды.
Соңғы 10 жылда әлемдік электр энергиясы өндірісі 6,5 ПВт⋅сағ-қа артты, алайда жел энергетикасы небәрі 1,7 ПВт⋅сағ, ал күн энергетикасы 1,5 ПВт⋅сағ қосқан. Негізгі өсім қазба отын есебінен болып отыр, бұл декарбонизацияға кедергі келтіреді.
2023 жылы Қазақстанда жел және күн энергетикасы жалпы электр энергиясын өндірудің 5%-ын құрады (2022 жылы 3,6% болған). Дегенмен, Қазақстан әлемдік көрсеткіштерден әлі де айтарлықтай артта қалып отыр. Мысалы, Германияда жел энергетикасы жалпы энергияның 27,7%-ын, ал күн энергетикасы 11,9%-ын қамтамасыз етеді. АҚШ пен Қытайда жел энергетикасының үлесі сәйкесінше 9,6% және 9,4%, ал күн энергетикасының үлесі 5,4% және 6,2%-ды құрайды.